06.யோக வாழ்க்கை விளக்கம் V

யோக வாழ்க்கை விளக்கம் V

                                                        (சென்ற இதழின் தொடர்ச்சி....)               கர்மயோகி

865) உள்ளெழுந்துவரும் ஆர்வத்தாலோ, புறச்சந்தர்ப்பத்தின் நிர்ப்பந்தத்தாலோ மனிதன் கடவுளை நாடுகிறான். ஏதோ ஒரு சமயம் தெய்வம் மனிதனை நேராகவோ, மறைமுகமாகவோ தன்னை நாடும்படி வற்புறுத்துகிறது.

ஆர்வத்தால் ஆண்டவனை நாடும் மனிதனை ஆண்டவனும் தன்னை நாடும்படி வற்புறுத்துகிறான்.

. சிருஷ்டி என நாம் கூறுவது ஆண்டவன் ஒளிவது.

. பரிணாமம் என்பது ஆண்டவன் ஒளிவதிலிருந்து எழுவது.

. ஆன்மாவின் 12 அம்சங்களிலும் இதை நாம் காணலாம்.

. அனந்தம், காலத்தைக் கடந்தது, ஐக்கியம், சத்தியம், நல்லது, ஞானம், திறமை, அழகு, அன்பு, ஆனந்தம், மௌனம், சக்தி, ஆகியவை அந்த 12 அம்சங்கள்.

. ஒளிவதும், கண்டுபிடிப்பதுமில்லாத வாழ்வின் அம்சமேயில்லை.

. அகம், புறம், ஆகியவை சிருஷ்டியின் பகுதிகள்.

. புறத்தைத் தன்னுட்கொண்ட அகமும் உண்டு.

. புறச்சந்தர்ப்பம் மனிதனை ஆண்டவனை நோக்கிச் செலுத்துவது நிர்ப்பந்தம்.

. அகம் ஆண்டவனை நாடுவது பக்தி.

. ஆண்டவனே மனிதனை நாடுவது அருள்.

. ஒரு பாக்டரியில் ஸ்டிரைக் செய்து சம்பள உயர்வு கேட்கிறார்கள், பெறுகிறார்கள்.

. அதிக இலாபம் வருவதால் நிர்வாகம் போனஸ் தருகிறது.

. சட்டம் ஏற்பட்டு சம்பளம் உயர்கிறது.

. மார்க்கட் வளர்வதால், ஆள் கிடைக்காமல் சம்பளத்தை உயர்த்து கிறார்கள்.

. அத்தனையும் உயரும் வழிகள்.

. நிலவரம் எதிரானால் இத்தனை முறைகளால் சம்பளம் குறையும்.

. கல்வி, மருத்துவம், நிர்வாகம், தொழில், விளையாட்டு, போர் ஆகிய அத்தனைத் துறைகளிலும் இத்தனை முறைகள் உண்டு.

. ஞானம் வளர்வதற்கும் இத்தனை வழிகள் உள.

. புதிய லோகங்களைக் கண்டுபிடித்து பூகோளம் எழுதுவதற்கும் பல வழிகள் உள்ளன.

. விஞ்ஞானம் புதியன காணவும் இதுவே சட்டம்.

. உலகில் உள்ளது ஒரு சட்டம், பல துறைகள். அத்தனைத் துறைகளும் ஒரே சட்டத்தைப் பலவிதமாகப் பின்பற்றுகின்றன.

. உரையாடலுக்கும் இந்தச் சட்டத்தைக் கருதினால் அங்கும் இது செல்லும் என அறியலாம்.

. காதலிலக்கியம் உலகின் கவனத்தைக் கவர்ந்தது.

. உயர்ந்த காதல் எழுவது, சிறப்பது, பலன் தருவதும் பல்வகைகள்.

. அவை பின்பற்றுவதும் இதே சட்டம்.

. ஆண்டவனும், மனிதனும் பிரம்மத்தின் இரு முனைகள் என்பதால் செயல் எங்கிருந்தும் எழும்.

****

866) முதலில் சொல்லியது உணர்வு; அடுத்தது உயர்ந்த உணர்வு அல்லது சைத்தியப்புருஷன். அவதாரப்புருஷனை மட்டுமே ஆண்டவன் நிர்ப்பந்திக்கிறான்.

அவதாரப்புருஷனைமட்டுமே ஆண்டவன் நிர்ப்பந்திக்கிறான்.

. நிர்ப்பந்தம் நாகரீகம் வளர்ந்த நிலையைக் காட்டும்.

. மக்கள் கல்வியை நாடுவது அவர்களைப்பொருத்தது.

. மேல்நாடுகளில் பையன் 16 வயதுவரை பள்ளிக்கு வாராவிட்டால், பெற்றோர் ஜெயிலுக்குப் போகவேண்டும்.

. பொதுமக்கள் கல்வி பெறவேண்டும்என்று சமூகம் கட்டாயப்படுத்த சமூகம் வளர்ந்து, கல்வியின் முக்கியத்துவத்தை அறிந்திருக்க வேண்டும்.

. இன்ஷுரன்ஸ் மக்கள் வசதிக்காக ஏற்பட்டது.

. கார் வாங்க கடன் கேட்டால், பாங்க் காரை இன்ஷுர் செய்யச்சொல்வது சமூகம் மறைமுகமாக மக்களைக் கட்டாயப் படுத்துவதாகும்.

. காலரா, அம்மை தடுப்புஊசிபோட சர்க்கார் நிர்ப்பந்தம் செய்வதும் உண்டு, செய்யாமலிருப்பதும் உண்டு.

. சமூகம் வளரும்முன் கட்டாயம் குறைவு.

. வளர்ந்தபின் கட்டாயம் அதிகம்.

. சமூகம் ஏற்படுமுன் (physical compulsion) எதிரியின் தாக்குதலை எதிர்க்க சமூகம் ஒவ்வொருவரையும் நிர்ப்பந்தம் செய்தது.

. திருமணம் செய்வது சட்டப்படி அவசியமில்லை.

. சமூகம் ஆயிரம் வகைகளாகக் கட்டாயப்படுத்துவதால் திருமணம் செய்து கொள்ள அபிப்பிராயமில்லாதவரும் செய்துகொள்கிறார்கள்.

. பிரம்மச்சாரிக்கு வாடகைவீடு கிடைக்காது.

. வயதான பிரம்மச்சாரிக்கு வேலை கொடுக்க எவரும் தயங்குவர்.

. பாங்க், சர்க்கார் ஆபீஸ், மற்ற எந்த இடத்திலும் பிரம்மச்சாரியை நம்பமாட்டார்கள்.

. எலக்ஷனில் நிற்பதற்கும் அது ஒரு பிரச்சினையாகும்.

. ஒரு ஸ்தாபனத்தில் தலைமைப்பதவிக்கு பிரம்மச்சாரியை விலக்குவார்கள்.

. ஆண்டவன் தற்சமயம் நம்மையெல்லாம் கட்டாயப்படுத்தாத இடங்களில் அவதாரப்புருஷனைக் கட்டாயப்படுத்துகிறான்.

. எந்த விஷயத்தில் யார் கட்டாயப்படுத்தப்படுகிறார் என்பது அந்தச் சமுதாயத்தின் நாகரீகம் வளர்ந்த நிலையைக் காட்டும்.

. மேல்நாடுகளில் பைத்தியம்பிடித்தவர்களை வீட்டில் வைத்திருக்கச் சட்டம் அனுமதிக்காது.

. சுத்தம் தேவைப்பட்டால் சர்க்கார் மக்களை சுத்தமாக இருக்கும்படிக் கட்டாயப்படுத்தும்.

. சிங்கப்பூரில் உள்ள சுத்தம் நம் நாட்டிலில்லை.

. SARS என்ற புது வியாதி வந்தவுடன் சிங்கப்பூரில் அவர்கள் வீட்டைவிட்டு வெளியே போகக் கூடாதுஎனச் சட்டம் வந்துவிட்டது.

தொடரும்.....

****